साँखु, काठमाण्डौं ।
नेकपा (एमाले) ले आगामी प्रतिनिधि सभा निर्वाचनका लागि आफ्नो महत्वाकांक्षी योजनासहितको घोषणापत्र सार्वजनिक गरेको छ। बिहीबार सार्वजनिक गरिएको उक्त घोषणापत्रमा एमाले नेतृत्वको सरकार बनेको पाँच वर्षभित्र नेपालको अर्थतन्त्रको आकारलाई १०० खर्ब रुपैयाँ पुर्याउने संकल्प गरिएको छ।
आगामी फागुन २१ गते हुने निर्वाचनलाई लक्षित गरी ल्याइएको यस मार्गचित्रमा आर्थिक समृद्धि र पूर्वाधार विकासलाई मुख्य प्राथमिकतामा राखिएको छ।
आर्थिक लक्ष्य र रोजगारी
एमालेले उच्च आर्थिक वृद्धिका माध्यमबाट मुलुकको कायापलट गर्ने दाबी गरेको छ। घोषणापत्रका मुख्य बुँदाहरू यसप्रकार छन्:
- अर्थतन्त्रको विस्तार: ५ वर्षमा १०० खर्ब र आगामी १० वर्षभित्र अर्थतन्त्रको आकार २०० खर्ब रुपैयाँ पुर्याउने लक्ष्य।
- आर्थिक वृद्धिदर: वार्षिक ७ देखि ९ प्रतिशतसम्मको आर्थिक वृद्धिदर हासिल गर्ने।
- प्रतिव्यक्ति आय: आगामी ५ वर्षमा नेपालीको औसत प्रतिव्यक्ति आय ३,००० अमेरिकी डलर पुर्याउने।
- न्यूनतम पारिश्रमिक: श्रमिकहरूको न्यूनतम तलब बढाएर २५,००० रुपैयाँ पुर्याउने घोषणा।
- रोजगारी सिर्जना: वार्षिक ५ लाख रोजगारीका अवसर सिर्जना गर्ने (जसमा ४ लाख उच्च आर्थिक वृद्धिबाट र १ लाख सूचना प्रविधि तथा लक्षित कार्यक्रमबाट हुने)।
पूर्वाधार र सेवा विस्तार
घोषणापत्रमा कृषि, सिँचाइ र स्वास्थ्य क्षेत्रमा पनि उल्लेख्य सुधारको प्रतिवद्धता जनाइएको छ:
- खानेपानी: सरकार गठन भएको दुई वर्षभित्रै हरेक घरमा स्वच्छ खानेपानी पुर्याउने।
- सडक र यातायात: हाल रहेका एक लेनका सडकहरूलाई दुई लेनमा विस्तार गर्ने।
- स्वास्थ्य: सबै स्थानीय तहमा अस्पताल निर्माण गरी आधुनिक उपकरण र गुणस्तरीय जनशक्तिमार्फत स्वदेशमै विश्वस्तरीय स्वास्थ्य सेवा दिने।
- कृषि र सिँचाइ: कृषि उत्पादकत्व बढाउन थप ३ लाख हेक्टर जमिनमा सिँचाइ सुविधा पुर्याउने।
पर्यटन र उद्योग
एमालेले औद्योगिक क्षेत्रको योगदानलाई दोब्बर बनाउने र पर्यटन पूर्वाधारको विकास गरी आगामी ५ वर्षमा पर्यटकको संख्या पनि दोब्बर बनाउने लक्ष्य राखेको छ। यसका लागि हवाई सेवा विस्तार र आन्तरिक सुरक्षालाई मजबुत बनाइने घोषणापत्रमा उल्लेख छ।
विद्युत् उत्पादन र खनिज उत्खननमा फड्को मार्दै औद्योगिक उत्पादन बढाउने एमालेको मुख्य चुनावी एजेन्डा रहेको छ।
