शंखरापुर,काठमाडौँ ।
राष्ट्रिय प्रजातन्त्र पार्टी (राप्रपा) ले संगठन विस्तार तथा सुदृढीकरण अभियानलाई थप तीव्र बनाउने क्रममा ‘केन्द्रीय सम्पर्क समाज समन्वय विभाग’ मा नयाँ सदस्य मनोनयन गरेको छ। सोही क्रममा काठमाडौँ महानगरसँगै शंखरापुर क्षेत्रका सक्रिय व्यक्तित्व मिजेन्द्रकाजी श्रेष्ठ उक्त विभागको सदस्य पदमा मनोनित हुनुभएको हो।
राप्रपाका अध्यक्ष राजेन्द्र लिङ्देन ले पार्टी विधान बमोजिम काठमाडौँ निवासी तथा शंखरापुर नगरपालिका वडा नं. ७ धूँल्लाटोलका स्थायी बासिन्दा श्रेष्ठलाई उक्त जिम्मेवारी प्रदान गर्नुभएको हो। मनोनयनसँग सम्बन्धित औपचारिक पत्र समेत श्रेष्ठलाई हस्तान्तरण गरिएको पार्टी स्रोतले जनाएको छ।
स्थानीयबाट केन्द्रीय तहसम्मको जिम्मेवारी
शंखरापुर नगरपालिका वडा नं. ७ धूँल्लाटोल निवासी श्रेष्ठ लामो समयदेखि सामाजिक तथा राजनीतिक क्षेत्रमा सक्रिय रहँदै आउनुभएको छ। स्थानीय तहमा जनसम्पर्क विस्तार, संगठन सुदृढीकरण तथा पार्टी गतिविधिमा उहाँको निरन्तर योगदानलाई मध्यनजर गर्दै केन्द्रीय तहमा जिम्मेवारी दिइएको पार्टी निकट स्रोतको भनाइ छ।
पार्टी हितमा सक्रिय रहने विश्वास
अध्यक्ष लिङ्देनद्वारा हस्ताक्षरित मनोनयन पत्रमा श्रेष्ठले पार्टीको सिद्धान्त, नीति तथा कार्यक्रमप्रति प्रतिबद्ध रहँदै राप्रपाको बृहत्तर हितमा प्रभावकारी भूमिका निर्वाह गर्ने विश्वास व्यक्त गरिएको छ। साथै, नयाँ जिम्मेवारी सफलतापूर्वक सम्हाल्न सकून् भन्ने कामनासहित पार्टीले उहाँलाई बधाई तथा शुभकामना व्यक्त गरेको छ।
संगठन सुदृढीकरणमा जोड
राप्रपाले पछिल्लो समय विभिन्न विभागहरूलाई पूर्णता दिँदै संगठनलाई जनस्तरसम्म विस्तार गर्ने रणनीति अघि बढाएको छ। विशेषगरी ‘केन्द्रीय सम्पर्क समाज समन्वय विभाग’ मार्फत विभिन्न समुदाय, पेशागत समूह तथा क्षेत्रीय तहसँग पार्टीको सम्बन्धलाई अझ सुदृढ बनाउने लक्ष्य लिइएको छ।
यसै सन्दर्भमा श्रेष्ठको मनोनयनले स्थानीय तहदेखि केन्द्रीय तहसम्म पार्टीको समन्वयकारी भूमिका थप प्रभावकारी हुने अपेक्षा गरिएको छ।
