काठमाडौँ/शंखरापुर । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीलाई अपूरणीय पितृशोक परेको छ । उहाँका पूज्य पिता मोहनप्रसाद ओलीको ९७ वर्षको पाको उमेरमा आज शुक्रबार बिहान निधन भएको छ ।
लामो समयदेखि अस्वस्थ रहँदै आउनुभएका मोहनप्रसादको भक्तपुरस्थित नेपाल–कोरिया मैत्री नगरपालिका अस्पतालमा उपचारका क्रममा बिहान ३ बजे निधन भएको हो । पछिल्लो समय छोरीको ममतामयी रेखदेखमा बस्दै आउनुभएका उहाँको स्वास्थ्य अवस्था एकाएक जटिल बनेपछि अस्पताल पुर्याइएको थियो, जहाँ चिकित्सकहरूले उहाँलाई मृत घोषित गरे ।
एउटा संघर्षशील जीवनको अध्याय ९७ वर्षको उमेरमा विदा भएको छ । आफ्ना सन्तानलाई देशको उच्च ओहोदासम्म पुगेको देख्न पाउनुभएका मोहनप्रसादका दुई छोरा र तीन छोरी हुनुहुन्छ ।
अध्यक्ष ओलीको सचिवालयका अनुसार, उहाँको पार्थिव शरीरलाई अन्तिम श्रद्धाञ्जलीका लागि भक्तपुरको गुण्डुस्थित ओली निवास लगिने तयारी गरिएको छ । आफ्ना पिताप्रति अन्तिम सम्मान प्रकट गरी आजै पशुपति आर्यघाटमा हिन्दु परम्परा अनुसार दाहसंस्कार गरिने कार्यक्रम रहेको छ ।
