शंखरापुर, काठमाडौं — सुनसरीको देवानगञ्ज गाउँपालिका–कप्तानगञ्जलगायतका क्षेत्रमा विकसित तनावपूर्ण अवस्थापछि संघीय सरकारले शान्ति–सुरक्षा व्यवस्थापनलाई प्राथमिकतामा राख्दै उच्चस्तरीय सक्रियता बढाएको छ। गृहमन्त्री सुधन गुरुङले बिहीबार सुनसरी प्रस्थान गर्नुअघि प्रधानमन्त्री बालेन्द्र शाह (बालेन)सँग भेट गरी सुरक्षा अवस्थाबारे विस्तृत जानकारी गराउनुभएको छ। यसैबीच राष्ट्रपति रामचन्द्र पौडेलले सामाजिक, धार्मिक तथा जातीय सद्भाव कायम राख्दै राष्ट्रिय एकतालाई सुदृढ बनाउन सबै पक्षलाई संयमता अपनाउन हार्दिक अपिल गर्नुभएको छ।
प्रधानमन्त्रीको सचिवालयका अनुसार बिहीबार भएको भेटमा गृहमन्त्री गुरुङले सुरक्षा निकायका प्रमुखहरूले प्रस्तुत गरेको प्रतिवेदन, प्रभावित क्षेत्रको वस्तुस्थिति तथा सरकारले अवलम्बन गरेका सुरक्षा उपायबारे प्रधानमन्त्रीलाई जानकारी गराउनुभएको थियो। त्यसक्रममा प्रधानमन्त्री शाहले कुनै पनि हालतमा शान्ति–सुरक्षा खल्बलिन नदिन, कानुनको प्रभावकारी कार्यान्वयन गर्न तथा नागरिकको जिउधनको सुरक्षा सुनिश्चित गर्न आवश्यक सबै कदम तत्काल चाल्न निर्देशन दिनुभएको सचिवालय स्रोतले जनाएको छ।
प्रधानमन्त्रीको सचिवालयले प्रधानमन्त्री शाहले आजै राष्ट्रका नाममा सम्बोधन गर्ने कार्यक्रम रहेको जनाएको छ। सम्बोधनमार्फत पछिल्लो घटनाक्रम, सरकारको धारणा तथा आगामी कार्ययोजनाबारे जानकारी गराइने अपेक्षा गरिएको छ।
सुनसरीसहित तराई–मधेसका केही क्षेत्रमा तनाव बढेपछि बिहीबार बसेको प्रतिनिधिसभा बैठकमा विपक्षी दलहरूले सरकारको भूमिकामाथि प्रश्न उठाउँदै घटनाको निष्पक्ष छानबिन, दोषीमाथि कानुनी कारबाही तथा प्रभावित क्षेत्रमा प्रभावकारी सुरक्षा व्यवस्था गर्न सरकारसँग माग गरेका थिए।
यसैबीच राष्ट्रपति रामचन्द्र पौडेलले जारी गर्नुभएको विशेष अपिलमा सुनसरीको देवानगञ्ज गाउँपालिका–कप्तानगञ्जलगायतका क्षेत्रमा देखिएको विषम परिस्थितिप्रति गहिरो चिन्ता व्यक्त गर्नुभएको छ। उहाँले नेपालको पहिचान सामाजिक, धार्मिक तथा जातीय सद्भाव, सहिष्णुता, मेलमिलाप र भ्रातृत्वमा आधारित रहेको उल्लेख गर्दै यसलाई जोगाउनु सम्पूर्ण नेपालीको साझा दायित्व भएको बताउनुभएको छ।
राष्ट्रपतिले सबै राजनीतिक दल, नागरिक समाज, स्थानीय समुदाय तथा सम्पूर्ण नेपाली नागरिकलाई संयमता अपनाउँदै शान्ति, अमनचयन र राष्ट्रिय एकतालाई थप मजबुत बनाउन आ–आफ्नो स्थानबाट सकारात्मक भूमिका निर्वाह गर्न आग्रह गर्नुभएको छ। उहाँले वर्तमान विषम परिस्थितिलाई यथाशीघ्र सामान्य अवस्थामा फर्काई नागरिकले सुरक्षित र शान्तिपूर्ण वातावरणमा जीवनयापन गर्न सक्ने अवस्था निर्माण गर्न सरकार सफल हुने विश्वास पनि व्यक्त गर्नुभएको छ।
अपिलमा घटनाको सत्यतथ्य छानबिन गरी दोषीलाई कानुनबमोजिम कडा कारबाही गर्न, भविष्यमा यस्ता घटना दोहोरिन नदिन आवश्यक सुरक्षा सतर्कता अपनाउन तथा समुदायबीच आपसी विश्वास, मित्रता, सहिष्णुता र सामाजिक सद्भाव कायम राख्न सम्बन्धित सबै पक्षलाई विशेष आग्रह गरिएको छ।
राष्ट्रपति पौडेलले घटनामा ज्यान गुमाएकाप्रति श्रद्धाञ्जली अर्पण गर्दै शोकसन्तप्त परिवारप्रति गहिरो समवेदना व्यक्त गर्नुभएको छ। पछिल्लो घटनाक्रमले मुलुकमा शान्ति, सामाजिक सद्भाव र राष्ट्रिय एकताको संरक्षणका लागि राज्य संयन्त्र, राजनीतिक दल, नागरिक समाज र आमनागरिकबीच थप सहकार्य आवश्यक रहेको देखिएको छ।
