नीर शाह उत्कृष्ट अभिनेता, मिरुना मगर उत्कृष्ट अभिनेत्री ‘ऊनको स्वीटर’ उत्कृष्ट चलचित्र, मदनकृष्ण श्रेष्ठ दीर्घ साधना सम्मानबाट सम्मानित

शंखरापुर,काठमाडौँ। राष्ट्रिय चलचित्र पुरस्कार २०८२ अन्तर्गत चलचित्र परान का लागि वरिष्ठ कलाकार नीर शाह उत्कृष्ट अभिनेता तथा चलचित्र ऊनको स्वीटर का लागि मिरुना मगर उत्कृष्ट अभिनेत्री घोषित भएका छन्। शुक्रबार राष्ट्रपति भवन शीतल निवासमा आयोजित राष्ट्रिय चलचित्र पुरस्कार तथा दीर्घ साधना सम्मान समारोहमा राष्ट्रपति रामचन्द्र पौडेलले विजेता कलाकार तथा चलचित्रकर्मीहरूलाई पुरस्कार प्रदान गरेका हुन्।

चलचित्र विकास बोर्ड, सञ्चार तथा सूचना प्रविधि मन्त्रालय तथा राष्ट्रिय चलचित्र पुरस्कार छनोट समितिद्वारा आयोजित उक्त कार्यक्रममा नेपाली चलचित्र क्षेत्रका विभिन्न विधामा उत्कृष्ट योगदान पुर्‍याउने स्रष्टा, कलाकार तथा प्राविधिकहरूलाई सम्मान गरिएको थियो।

यस वर्ष ऊनको स्वीटर उत्कृष्ट चलचित्र घोषित भएको छ। उक्त चलचित्रका निर्देशक नवीन चौहान उत्कृष्ट निर्देशक घोषित भए भने उत्कृष्ट पटकथाको पुरस्कार दीपक प्रसाद आचार्य र यम थापाले संयुक्त रूपमा प्राप्त गरेका छन्। त्यस्तै उत्कृष्ट छायाङ्कनतर्फ बाबु श्रेष्ठ सम्मानित भएका छन्। नेपाली कला, साहित्य र चलचित्र क्षेत्रमा दीर्घकालीन योगदान पुर्‍याएबापत वरिष्ठ कलाकार मदनकृष्ण श्रेष्ठलाई दीर्घ साधना सम्मान प्रदान गरिएको छ।

उत्कृष्ट अभिनेताको पुरस्कार प्राप्त गरेको परान चलचित्रले एक वृद्ध बुबा र उनका सन्तानहरूबीचको भावनात्मक सम्बन्ध, पारिवारिक जिम्मेवारी र व्यक्तिगत आकांक्षाबीच उत्पन्न हुने द्वन्द्वलाई मार्मिक ढंगले प्रस्तुत गरेको छ। चलचित्रमा नीर शाहले निर्वाह गरेको भूमिकाले दर्शक र समीक्षक दुवैबाट उच्च प्रशंसा प्राप्त गरेको थियो।

त्यसैगरी उत्कृष्ट अभिनेत्रीको पुरस्कार जितेकी मिरुना मगर अभिनीत ऊनको स्वीटर ले पूर्वी नेपालको सामाजिक तथा सांस्कृतिक परिवेशमा आधारित विशेष प्रेमकथालाई पर्दामा उतारेको छ। फरक समुदायका दुई व्यक्तिबीचको सम्बन्ध, सामाजिक यथार्थ र मानवीय संवेदनालाई कलात्मक ढंगले प्रस्तुत गरिएको उक्त चलचित्र गत वर्ष दर्शकमाझ अत्यन्त लोकप्रिय बनेको थियो।

राष्ट्रिय चलचित्र पुरस्कारका लागि चलचित्रको समग्र गुणस्तर, अभिनय क्षमता, निर्देशन, पटकथा, छायाङ्कन तथा अन्य प्राविधिक पक्षहरूको मूल्याङ्कन गरिन्छ। चलचित्र विकास बोर्डले गठन गरेको विज्ञहरूको समितिले विभिन्न विधामा प्राप्त चलचित्रहरूको अध्ययन तथा मूल्याङ्कनपछि विजेताको छनोट गर्ने व्यवस्था रहेको छ।

छनोट समितिले नीर शाह र मिरुना मगरलाई उनीहरूले सम्बन्धित चलचित्रमा प्रस्तुत गरेको सशक्त अभिनय, पात्रप्रतिको न्याय तथा नेपाली चलचित्र क्षेत्रमा पुर्‍याएको योगदानको कदरस्वरूप सम्मानित गरेको जनाएको छ।

राष्ट्रिय चलचित्र पुरस्कारलाई नेपाली चलचित्र क्षेत्रको सबैभन्दा प्रतिष्ठित सरकारी सम्मानका रूपमा लिइन्छ। यस पुरस्कारले चलचित्र निर्माणमा गुणस्तर अभिवृद्धि गर्न, कलाकार तथा प्राविधिकहरूलाई प्रोत्साहन गर्न र नेपाली चलचित्र उद्योगको समग्र विकासमा टेवा पुर्‍याउने अपेक्षा गरिएको छ। पछिल्ला वर्षहरूमा विषयवस्तु, प्रस्तुति र प्राविधिक पक्षमा उल्लेखनीय सुधार गर्दै गएको नेपाली चलचित्र उद्योगका लागि यस प्रकारका सम्मानले थप ऊर्जा प्रदान गर्ने विश्वास चलचित्रकर्मीहरूले व्यक्त गरेका छन्।