एक गोल पनि नखाई स्पेन क्वार्टरफाइनलमा, अतिरिक्त समयमा पोर्चुगल स्तब्ध

शंखरापुर,काठमाण्डौं।फिफा विश्वकप २०२६ अन्तर्गत अन्तिम १६ को सर्वाधिक प्रतिक्षित प्रतिस्पर्धामा स्पेनले अतिरिक्त समयमा गरेको एकमात्र गोलको बलमा पोर्चुगललाई १–० ले पराजित गर्दै क्वार्टरफाइनलमा स्थान सुरक्षित गरेको छ। अमेरिकाको डालसस्थित एटी एन्ड टी (AT&T) स्टेडियममा सम्पन्न रोमाञ्चक तथा उच्चस्तरीय प्रतिस्पर्धामा निर्धारित ९० मिनेटसम्म कुनै टोलीले गोल गर्न नसकेपछि खेल अतिरिक्त समयमा पुगेको थियो।

खेलको निर्णय अतिरिक्त समयको सुरुआतमै भयो। स्पेनका मिकेल मेरिनोले फेरान टोरेसको उत्कृष्ट पासलाई सशक्त प्रहारमार्फत गोलमा परिणत गर्दै स्पेनलाई बहुमूल्य अग्रता दिलाए। उक्त गोल नै खेलको निर्णायक गोल सावित भयो र त्यसपछि स्पेनले अनुशासित रक्षात्मक प्रदर्शन गर्दै पोर्चुगललाई बराबरी गर्ने कुनै अवसर दिएन।

यस ऐतिहासिक जितसँगै स्पेन १६ वर्षपछि विश्वकपको क्वार्टरफाइनलमा प्रवेश गर्न सफल भएको छ। सन् २०१० मा विश्वकपको उपाधि जितेपछि पहिलो पटक अन्तिम आठमा पुगेको स्पेनले यसपटक उपाधि यात्रालाई थप मजबुत बनाएको छ। सन् २०१४ मा समूह चरणबाटै बाहिरिएको स्पेन २०१८ र २०२२ मा अन्तिम १६ बाटै घर फर्किएको थियो।

स्पेनको आक्रामक खेल र सशक्त रक्षापङ्क्ति

खेलभरि स्पेनले बल नियन्त्रण, पासिङ र आक्रमण निर्माणमा स्पष्ट बर्चस्व कायम गर्‍यो। स्पेनले ५६ प्रतिशत समय बल आफ्नो नियन्त्रणमा राख्दा पोर्चुगल ४४ प्रतिशतमा सीमित रह्यो। लक्ष्यतर्फ स्पेनले ६ सट प्रहार गर्दा पोर्चुगलले केवल २ सट मात्रै गोलपोस्टको दिशामा राख्न सक्यो। स्पेनले ५३४ सफल पास पूरा गर्दा पोर्चुगलले ४२७ पास पूरा गरेको थियो। कर्नरमा पनि स्पेन ७–३ ले अगाडि रह्यो।

खेलका क्रममा स्पेनले १२ र पोर्चुगलले ९ फाउल गरे। पोर्चुगलका दुई तथा स्पेनका एक खेलाडीले पहेंलो कार्ड पाए भने खेलमा कुनै रातो कार्ड प्रयोग गर्नुपरेन। इङ्ल्यान्डका अनुभवी रेफ्री एन्टोनी टेलरले खेल सञ्चालन गरेका थिए।

स्टार खेलाडीहरूको भिडन्त

पोर्चुगलका कप्तान क्रिस्टियानो रोनाल्डो, ब्रुनो फर्नान्डेज, जोआओ फेलिक्स, भिटिन्हा, रुबेन डियास, नुनो मेन्डेस र गोलरक्षक डिएगो कोस्टा मैदानमा उत्रिएका थिए। यता स्पेनबाट लामिने यामल, पेद्री, रोड्री, डानि ओल्मो, मिकेल ओयारजाबल, पाउ कुबार्सी, मार्क कुकुरेला तथा गोलरक्षक उनाइ सिमोनले उत्कृष्ट प्रदर्शन गरे।

रोनाल्डोको विश्वकप सपना फेरि अधुरै

यस हारसँगै पोर्चुगलको विश्वकप यात्रा अन्तिम १६ मै टुङ्गिएको छ। सन् २०२२ को कतार विश्वकपमा क्वार्टरफाइनल पुगेको टोली यसपटक एक कदम अगाडि बढ्न सकेन। विश्व फुटबलका महान् खेलाडीमध्ये एक क्रिस्टियानो रोनाल्डोका लागि यो सम्भवतः अन्तिम विश्वकप खेलसमेत हुन सक्ने आँकलन गरिएकाले पोर्चुगल समर्थकका लागि यो हार अत्यन्त भावुक क्षण बनेको छ। आफ्नो लामो अन्तर्राष्ट्रिय करियरमा विश्वकप उपाधि जित्ने सपना भने रोनाल्डोका लागि अझै अधुरै रहने सम्भावना बलियो बनेको छ।

उपाधि दाबेदारका रूपमा स्पेन

स्पेनले यस खेलमा गोल नखाई उत्कृष्ट रक्षात्मक प्रदर्शन गर्नुका साथै धैर्य, संयम र सामूहिक खेलको नमुना प्रस्तुत गरेको छ। अनुभवी खेलाडी र युवा प्रतिभाको सन्तुलित संयोजनमा रहेको स्पेन अहिले विश्वकप उपाधिको प्रमुख दाबेदारका रूपमा उभिएको छ। अतिरिक्त समयमा प्राप्त यो महत्वपूर्ण जितले टोलीको आत्मविश्वास उच्च बनाएको छ भने विश्व फुटबलमा स्पेनको पुनरागमनको सशक्त संकेतसमेत दिएको छ।