काठमाडौं । अमेरिकी राष्ट्रपति Donald Trump ले इरानलाई हतियार आपूर्ति नगर्न चीनलाई कडा चेतावनी दिएका छन्। अमेरिकी खुफिया स्रोतलाई उद्धृत गर्दै केही अन्तर्राष्ट्रिय सञ्चारमाध्यमहरूले चीनले इरानलाई हतियार पठाउने तयारी गरेको खबर सार्वजनिक गरेपछि ट्रम्पले यस्तो प्रतिक्रिया दिएका हुन्।
अमेरिकी समाचार संस्था CNN सँगको कुराकानीमा ट्रम्पले भने, “यदि चीनले त्यसो गरिरहेको छ भने त्यो चीनका लागि ठूलो समस्या हुनेछ।” रिपोर्टअनुसार चीनले काँधबाट प्रहार गर्न मिल्ने मिसाइल तथा ‘एयर डिफेन्स’ प्रणालीसँग सम्बन्धित हतियार केही हप्ताभित्र इरान पठाउने तयारीमा रहेको उल्लेख गरिएको छ।
यसैबीच अमेरिका र इजरायलले फेब्रुअरी २८ मा इरानमाथि संयुक्त सैन्य आक्रमण गरेका थिए। त्यसपछि दुई देशबीच बढ्दो तनावका बीच अस्थायी युद्धविराम भएको भए पनि दीर्घकालीन समाधानको प्रयास भने असफल बन्दै गएको छ।
हालै पाकिस्तानमा सम्पन्न अमेरिका–इरान वार्ता पनि निष्कर्षविहीन बनेको छ। शनिबारदेखि आइतबार बिहानसम्म चलेको उक्त वार्ताको नेतृत्व अमेरिकी उपराष्ट्रपति JD Vance ले गरेका थिए। उनले इरानले अमेरिकी प्रस्ताव अस्वीकार गरेको जानकारी दिँदै भने, “उनीहरू हाम्रो सर्त मान्न तयार देखिएनन्।”
अमेरिकाले इरानबाट परमाणु हतियार नबनाउने स्पष्ट प्रतिबद्धता मागिरहेको छ भने इरानले ती मागहरू अत्यन्त कडा र अव्यावहारिक रहेको दाबी गरेको छ। दुवै पक्षबीचको अविश्वास कायमै रहेकाले पुनः सैन्य द्वन्द्व भड्किने खतरा बढेको विश्लेषण गरिएको छ।
यस्तो संवेदनशील अवस्थामा इरानलाई सम्भावित रक्षात्मक सहयोग गर्न चीन अग्रसर हुन सक्ने अनुमान गरिँदै आएको छ। यही सन्दर्भमा ट्रम्पले चीनलाई चेतावनी दिँदै क्षेत्रीय सुरक्षामा थप तनाव सिर्जना हुन नदिन आग्रह गरेका हुन्।
