शंखरापुर,काठमाण्डौं। भारतीय चलचित्र संगीतका चर्चित पार्श्वगायक नेपाल आइपुगेका छन्। सन् १९९० को दशकमा बलिउड संगीत जगतमा एकछत्र लोकप्रियता हासिल गरेका अभिजितलाई नेपाल आगमनका क्रममा भव्य स्वागत गरिएको छ।
नेपाल आगमनपछि सार्वजनिक भएका तस्बिरहरूमा उनलाई परम्परागत नेपाली ढाका टोपी, खादा तथा पुष्पगुच्छा प्रदान गर्दै सम्मान गरिएको देखिन्छ। नेपाली संस्कृति र आतिथ्यप्रति उनले खुसी व्यक्त गरेको आयोजक पक्षले जनाएको छ।
नेपाल भ्रमणको मुख्य उद्देश्य शनिबार दरबारमार्गस्थित चर्चित रात्रिकालीन मनोरञ्जन केन्द्र clubnova.com.np मा आयोजना हुन लागेको विशेष सांगीतिक कन्सर्ट रहेको छ। उक्त कार्यक्रममा अभिजितले आफ्ना दशकौँदेखि लोकप्रिय रहँदै आएका सदाबहार गीतहरू प्रस्तुत गर्ने कार्यक्रम तय भएको छ।
बलिउड संगीतका पारखीहरूका लागि विशेष आकर्षणका रूपमा हेरिएको यस कन्सर्टमा ‘रोमान्टिक मेलोडी’ शैलीका चर्चित गीतहरू प्रत्यक्ष सुन्न पाइने अपेक्षा गरिएको छ। अभिजितका आवाजमा रेकर्ड भएका थुप्रै गीतहरू दक्षिण एसियाली संगीतप्रेमीमाझ आज पनि उत्तिकै लोकप्रिय छन्।
आयोजकका अनुसार कार्यक्रमलाई व्यवस्थित, सुरक्षित र भव्य बनाउन आवश्यक सम्पूर्ण तयारी पूरा गरिएको छ। दर्शकको उच्च सहभागितालाई मध्यनजर गर्दै सुरक्षा व्यवस्थालाई समेत विशेष प्राथमिकता दिइएको बताइएको छ।
नेपालमा बलिउड कलाकारहरूको प्रस्तुति प्रति दर्शकको बढ्दो आकर्षणबीच अभिजित भट्टाचार्यको आगमनले सांगीतिक माहोल थप उत्साहपूर्ण बनेको छ। उनका प्रशंसकहरू प्रत्यक्ष रूपमा आफ्ना प्रिय गायकलाई सुन्न र भेट्न उत्साहित देखिएका छन्।
