शंखरापुर, काठमाडौं — युवा नेतृत्व विकास, सामाजिक उत्तरदायित्व र मानव सेवाको भावनालाई केन्द्रमा राख्दै साँखु जेसीजले आयोजना गरेको वार्षिक ‘जेसीज सप्ताह–२०२६’ विविध सामाजिक, शैक्षिक, स्वास्थ्य, वातावरणीय तथा खेलकुद गतिविधिसहित भव्य रूपमा सम्पन्न भएको छ।
“मानवताको सेवा नै जीवनको सर्वोत्तम कार्य हो” भन्ने मूल मन्त्रलाई आत्मसात् गर्दै सञ्चालन गरिएको सप्ताहव्यापी अभियानको समापन शालीनदीस्थित समारा गार्डेनमा आयोजित विशेष समारोहका बीच गरिएको हो। समापन समारोहले सप्ताहभर सञ्चालन भएका आठवटै कार्यक्रमको उपलब्धि सार्वजनिक गर्दै समाजसेवा, नेतृत्व विकास र सामुदायिक सहभागितालाई अझ प्रभावकारी बनाउने प्रतिबद्धता व्यक्त गरेको छ।
साँखु जेसीज–२०२६ का अध्यक्ष आशिष श्रेष्ठको सभापतित्वमा सम्पन्न समारोहमा बागमती प्रदेश क्षेत्र नं. २ का प्रतिनिधिसभा सदस्य सुनिल के.सी. प्रमुख अतिथि रहनुभएको थियो। कार्यक्रममा शंखरापुर नगरपालिकाका प्रमुख रमेश नापित, उपप्रमुख समिता श्रेष्ठ, नेपाल जेसीजका राष्ट्रिय उपाध्यक्ष विकेश श्रेष्ठ, साँखु जेसीजका पूर्वअध्यक्षहरू, विभिन्न सामाजिक संस्थाका प्रतिनिधि, भद्र महिला, समाजसेवी तथा स्थानीयवासीको उल्लेखनीय सहभागिता रहेको थियो।
महासचिव पवन श्रेष्ठले सञ्चालन गर्नुभएको कार्यक्रममा जेसीज सप्ताह–२०२६ का मूल संयोजक रोजन सिंले सप्ताहभर सञ्चालन भएका कार्यक्रमहरूको विस्तृत प्रगति विवरण प्रस्तुत गर्दै कार्यक्रम सफल बनाउन सहयोग गर्ने सरकारी निकाय, विभिन्न सङ्घसंस्था, प्रायोजक, स्वयंसेवक तथा सम्पूर्ण सहभागीप्रति आभार व्यक्त गर्नुभयो।
जेसीज सप्ताहको सुरुआत असार १० गते जेसीआई साँखुको स्थापना दिवसको अवसरमा गरिएको फलफूल वितरण कार्यक्रमबाट भएको थियो। पूर्वअध्यक्ष जयराम श्रेष्ठको संयोजनमा सुष्मा कोइराला मेमोरियल अस्पतालमा उपचाररत बिरामीहरूलाई फलफूल वितरण गर्दै सामाजिक सेवाको सन्देश प्रवाह गरिएको थियो।
त्यसपछि असार १३ र १४ गते सदस्यहरूबीच आपसी सम्बन्ध, नेतृत्व विकास र भाइचाराको भावना अभिवृद्धि गर्ने उद्देश्यले सुकुटे बिचसम्म मैत्रीपूर्ण यात्रा, र्याफ्टिङ तथा स्विमिङ कार्यक्रम सञ्चालन गरिएको थियो।
स्वास्थ्य सेवामा योगदान पुर्याउने उद्देश्यले असार २० गते साँखुको चलाखु टोलमा आयोजित रक्तदान कार्यक्रममा नेपाल रेडक्रस सोसाइटी भक्तपुर शाखाको समन्वय तथा कञ्चन श्रेष्ठको संयोजनमा ७० जना स्वयंसेवी रक्तदाताले रक्तदान गरेका थिए। स्थानीयस्तरमा आयोजित उक्त कार्यक्रमलाई सप्ताहकै प्रभावकारी सामाजिक अभियानका रूपमा हेरिएको छ।
शैक्षिक तथा बौद्धिक विकासलाई प्राथमिकता दिँदै असार २१ गते दि हाकुज रेस्टुरेन्टमा कक्षा ९ देखि १२ सम्मका विद्यार्थीहरूबीच अन्तरविद्यालय वक्तृत्वकला प्रतियोगिता आयोजना गरिएको थियो। मनिष मल्लको संयोजनमा सम्पन्न प्रतियोगितामा चिरायु एकेडेमीकी अन्सुला श्रेष्ठ प्रथम, श्रीया श्रेष्ठ द्वितीय तथा भाग्योदय माध्यमिक विद्यालयकी कोपिला पुरी तृतीय हुन सफल हुनुभएको थियो।
आर्थिक सचेतना अभिवृद्धि गर्ने उद्देश्यले असार २७ गते वज्रयोगिनी रिसोर्टमा वित्तीय साक्षरता तथा सेयर बजारसम्बन्धी प्रशिक्षण आयोजना गरिएको थियो। प्रतिका नापितको संयोजनमा सम्पन्न कार्यक्रममा विज्ञ प्रशिक्षक रोशन चिकंबन्जारले सेयर बजार, लगानी व्यवस्थापन, जोखिम तथा अवसरका विषयमा व्यावहारिक प्रशिक्षण प्रदान गर्नुभएको थियो।
युवामा खेलकुद संस्कृतिको विकास गर्ने उद्देश्यले असार २८ गते बृहस्पति फुटसलमा मैत्रीपूर्ण फुटसल प्रतियोगिता आयोजना गरिएको थियो। दिपेश श्रेष्ठको संयोजनमा सम्पन्न प्रतियोगितामा जेसीज सदस्य, बोर्ड पदाधिकारी तथा विभिन्न टोलीबीच सौहार्दपूर्ण प्रतिस्पर्धा भएको थियो।
श्रावण २ गते भक्तिब्याम्बो कटेजमा मनिष गोपाल कारञ्जितको संयोजनमा सम्पन्न खुला नकआउट टेबल टेनिस प्रतियोगितामा ५३ जना खेलाडी सहभागी भएका थिए। पुरुषतर्फ सागर लामा प्रथम, विशाल लामा द्वितीय र प्रबिन परियार तृतीय भए भने महिलातर्फ हिमानी तामाङ प्रथम, प्रतिका नापित द्वितीय तथा धिमा कुमारी उपाध्याय तृतीय हुनुभएको थियो।
वातावरण संरक्षणलाई प्राथमिकतामा राख्दै श्रावण ९ गते साँखुको कोलागाल क्षेत्रमा **राजन के.सी.**को संयोजनमा वृक्षारोपण कार्यक्रम सञ्चालन गरिएको थियो। कार्यक्रममा ज्यापुकाउन्दा, ओखर, अम्बालगायत विभिन्न फलफूल तथा अन्य प्रजातिका बिरुवा रोपिनुका साथै तिनको दीर्घकालीन संरक्षणका लागि सुरक्षात्मक जालीसमेत जडान गरिएको थियो।
समापन समारोहलाई सम्बोधन गर्दै प्रमुख अतिथि **सुनिल के.सी.**ले युवाहरूको नेतृत्व, सामाजिक उत्तरदायित्व र सामुदायिक विकासमा साँखु जेसीजले निर्वाह गर्दै आएको भूमिका अनुकरणीय रहेको बताउनुभयो। उहाँले सामाजिक रूपान्तरणका लागि यस्ता सिर्जनात्मक अभियानलाई निरन्तरता दिनुपर्ने आवश्यकता औँल्याउनुभयो।
नगरप्रमुख रमेश नापित, उपप्रमुख समिता श्रेष्ठ, राष्ट्रिय उपाध्यक्ष विकेश श्रेष्ठ तथा अन्य वक्ताहरूले पनि साँखु जेसीजले स्वास्थ्य, शिक्षा, वातावरण, खेलकुद, आर्थिक साक्षरता र सामाजिक सेवाका क्षेत्रमा सञ्चालन गरेका कार्यक्रमले स्थानीय समाजमा सकारात्मक प्रभाव पारेको उल्लेख गर्दै आगामी दिनमा अझ व्यापक र प्रभावकारी कार्यक्रम सञ्चालन गर्न शुभकामना व्यक्त गर्नुभयो।
साँखु जेसीजले हरेक वर्ष आयोजना गर्दै आएको ‘जेसीज सप्ताह’ले युवा नेतृत्व विकाससँगै समाजसेवा, नागरिक सचेतना, वातावरण संरक्षण तथा सामुदायिक एकताको भावना सुदृढ बनाउने प्रभावकारी अभियानका रूपमा आफ्नो अलग पहिचान स्थापित गर्दै आएको सहभागीहरूले बताएका छन्।
