साँखु,काठमाण्डौं । काठमाण्डौंको कीर्तिपुरमा एक युवकको हत्या गरिएको घटनामा संलग्न रहेको आरोपमा प्रहरीले तीन जनालाई पक्राउ गरेको छ। धारिलो हतियार प्रयोग गरी गरिएको उक्त घटनापछि क्षेत्रमा त्रास फैलिएको छ भने प्रहरीले घटनालाई गम्भीर रूपमा लिएर अनुसन्धान अघि बढाएको जनाएको छ।
जिल्ला प्रहरी परिसर काठमाण्डौंका अनुसार गत वैशाख २३ गते कीर्तिपुर नगरपालिका–१० पोडेटोलस्थित चिया सागर नजिक २२ वर्षीय विपिन घिमिरेमाथि धारिलो हतियार प्रहार गरिएको थियो। गम्भीर घाइते भएका घिमिरेको उपचारका क्रममा मृत्यु भएको प्रहरीको भनाइ छ।
मृतक घिमिरे गुल्मीको धुर्कोट गाउँपालिकाका स्थायी बासिन्दा हुन्। उनी हाल कीर्तिपुर–३ ढाल्पामा बस्दै आएका थिए। घटनापछि स्थानीयवासीमा त्रास फैलिएको थियो भने प्रहरीले तत्काल अनुसन्धानलाई तीव्र बनाएको थियो।
प्रहरी वृत्त कीर्तिपुरबाट खटिएको विशेष टोलीले विभिन्न स्थानमा खोजतलास तथा निगरानी बढाएपछि घटनामा संलग्न रहेको आरोपमा तीन जनालाई पक्राउ गरिएको हो। पक्राउ पर्नेहरूमा अछाम साँफेबगर नगरपालिका–४ घर भई हाल कीर्तिपुर–९ भाजंगल बस्दै आएका २५ वर्षीय महेन्द्र शाह, कैलाली बर्दगोरिया गाउँपालिका–४ घर भई हाल कीर्तिपुर–१० पाँगा दोबाटो बस्दै आएका २३ वर्षीय रविन्द्र धामी तथा कैलाली घोडाघोडी नगरपालिका–१ घर भई हाल कीर्तिपुर–८ सिनेमा हल नजिक बस्दै आएका २२ वर्षीय रोशन विष्ट रहेका छन्।
प्रहरीका अनुसार पक्राउ परेका तीनै जनामाथि कर्तव्य ज्यान मुद्दाअन्तर्गत अनुसन्धान प्रक्रिया अघि बढाइएको छ। काठमाण्डौं जिल्ला अदालतबाट सात दिनको म्याद थप गरी उनीहरूमाथि थप अनुसन्धान भइरहेको जिल्ला प्रहरी परिसर काठमाण्डौंका प्रवक्ता तथा प्रहरी उपरीक्षक पवनकुमार भट्टराईले जानकारी दिनुभयो।
घटनामा प्रयोग गरिएको धारिलो हतियार, घटनास्थलबाट संकलित प्रमाण, प्रत्यक्षदर्शीको बयान तथा अन्य प्राविधिक आधारहरूका माध्यमबाट अनुसन्धान भइरहेको प्रहरीले जनाएको छ। घटनाको वास्तविक कारण, आपसी विवाद वा पूर्वयोजनाको कोणबाट समेत अनुसन्धान केन्द्रित गरिएको बताइएको छ।
पछिल्लो समय शहरी क्षेत्रमा युवाबीच हुने झैझगडा तथा हिंसात्मक गतिविधि बढ्दै गएको भन्दै स्थानीयवासीले सुरक्षा व्यवस्था थप प्रभावकारी बनाउन माग गरेका छन्। प्रहरीले भने घटनामा संलग्न जोसुकै भए पनि कानुनी दायरामा ल्याइने र निष्पक्ष अनुसन्धान गरिने स्पष्ट पारेको छ।
