साँखु, काठमाडौँ । शंखरापुर नगरपालिकाको वडा नं. ५ कार्यालयले साबिक सुनटोल गाविस वडा नं. ९(घ) अन्तर्गत पर्ने जग्गा व्यवस्थापन सम्बन्धी कार्य अघि बढाउँदै सार्वजनिक सूचना जारी गरेको छ। वडा कार्यालयले प्रकाशित सूचनामार्फत स्थानीयवासी, छिमेकी, सरोकारवाला तथा सम्भावित प्रभावित पक्षलाई सात दिनभित्र निवेदन दिन आग्रह गरेको हो।
वडा कार्यालयका अनुसार साबिक सुनटोल गाविस वडा नं. ९(घ) मा पर्ने कित्ता नं. ७३ को करिब ६ रोपनी ६ आना क्षेत्रफल जग्गा विराज पण्डितको नाममा मालपोत कार्यालय साँखुमा दर्ता प्रमाणित रहेको उल्लेख गरिएको छ। उक्त जग्गा व्यवस्थापन गर्दा निस्कने माटो ओसारपसार तथा विस्तार कार्यका कारण कसैको साँध–सँधियार, घर–छिमेकी, स्थानीय बासिन्दा वा अन्य सरोकारवालालाई असर पर्ने वा नपर्ने विषयमा आफ्नो धारणा दिन आग्रह गरिएको हो।
सूचनामा उल्लेख भएअनुसार सूचना टाँस भएको मितिले सात दिनभित्र सम्बन्धित पक्षले वडा कार्यालयमा लिखित निवेदन दिन सक्नेछन्। प्राप्त निवेदनका आधारमा आवश्यक अध्ययन, छलफल तथा निर्णय प्रक्रिया अघि बढाइने वडा कार्यालयले जनाएको छ।
स्थानीय तहमा विकास निर्माण तथा निजी जग्गा व्यवस्थापनका काम गर्दा सार्वजनिक जानकारीसहित प्रभावित पक्षलाई सुनुवाईको अवसर दिनु राम्रो प्रशासनिक अभ्यासका रूपमा हेरिएको छ। यसले भविष्यमा हुन सक्ने विवाद न्यूनीकरण गर्नुका साथै विकास निर्माण कार्यलाई व्यवस्थित बनाउन सहयोग पुग्ने अपेक्षा गरिएको छ।
५ का वडा अध्यक्ष शेर गम्भिर थापाको हस्ताक्षरसहित जारी सूचनाले नगर क्षेत्रभित्र हुने यस्ता कार्यमा पारदर्शिता, उत्तरदायित्व र स्थानीय सहभागितालाई प्राथमिकता दिइएको देखिन्छ। वडा कार्यालयले समयसीमाभित्र आफ्नो गुनासो वा सुझाव पेश गर्न सम्बन्धित सबै पक्षलाई अनुरोध गरेको छ।
