शंखरापुर, काठमाडौं — स्थानीय जनजीवन, सामाजिक गतिविधि र राजनीतिक अभ्याससँग लामो समयदेखि जोडिँदै आउनुभएका दीपक केसीले राष्ट्रिय प्रजातन्त्र पार्टी (राप्रपा) काठमाडौं जिल्ला अध्यक्षका लागि उम्मेदवारी प्रस्तुत गर्नुभएको छ। जनताको बीचमा रहेर प्राप्त गरेको सामाजिक तथा राजनीतिक अनुभवलाई जिल्ला संगठनको नेतृत्वसँग जोड्दै केसीले राप्रपालाई निर्वाचनमुखी मात्र नभई निरन्तर जनताको बीचमा रहने संगठनका रूपमा स्थापित गर्ने एजेन्डा अघि सार्नुभएको छ।
शंखरापुर क्षेत्रको सामाजिक–राजनीतिक पृष्ठभूमिबाट उदाएका केसी स्थानीय तहमा जनप्रतिनिधिका रूपमा समेत काम गरिसक्नुभएको छ। जनप्रतिनिधिका रूपमा काम गर्दा नागरिकका दैनिक समस्या, विकासका आवश्यकता र सार्वजनिक सेवा प्रवाहसँग प्रत्यक्ष जोडिएर काम गरेको अनुभवलाई उहाँले आफ्नो राजनीतिक यात्राको महत्वपूर्ण आधारका रूपमा लिनुभएको छ।
यही अनुभवका आधारमा जिल्ला नेतृत्वको दाबी गर्दै उहाँले काठमाडौंको बदलिँदो राजनीतिक परिवेशमा राप्रपाको संगठनलाई नयाँ कार्यशैली र जनसम्बन्धका आधारमा अघि बढाउनुपर्ने आवश्यकता औँल्याउनुभएको छ।
‘राजनीतिक संगठन चुनावका बेला मात्र सक्रिय हुने होइन, जनताको सुख–दुःखमा वर्षभरि उपस्थित हुनुपर्छ,’ केसीले भन्नुभयो, ‘जनताको विश्वास नाराबाट होइन, निरन्तरको उपस्थिति र व्यवहारबाट जित्न सकिन्छ।’
केसीले जिल्ला अध्यक्षको जिम्मेवारी पाए पार्टी संगठनलाई वडा तहसम्म व्यवस्थित र सक्रिय बनाउने योजना अघि सार्नुभएको छ। उहाँले वडा तहमा नियमित संगठनात्मक गतिविधि सञ्चालन, कार्यकर्ताको क्षमता विकास, युवालाई नेतृत्वमा अवसर तथा महिला र विभिन्न समुदायको सहभागिता बढाउने विषयलाई प्राथमिकतामा राख्नुभएको छ।
स्थानीय स्तरमा नागरिकका समस्या संकलन, पहिचान र समाधानका लागि सम्बन्धित निकायसँग समन्वय गर्ने स्थायी संयन्त्र निर्माण गर्ने उहाँको योजना छ।
उहाँका अनुसार बलियो जिल्ला संगठन निर्माणको आधार वडा तह नै भएकाले केन्द्र वा जिल्ला तहका गतिविधिले मात्र संगठनलाई प्रभावकारी बनाउन सकिँदैन।
‘वडा तहमा संगठन बलियो भए मात्र जिल्ला बलियो हुन्छ,’ उहाँले भन्नुभयो, ‘कार्यकर्तालाई जिम्मेवारी दिने, उनीहरूको क्षमता बढाउने र जनतासँग जोडिने वातावरण बनाउनु मेरो प्राथमिकता हुनेछ।’
काठमाडौं जिल्लाभित्रै नागरिकका समस्या भूगोलअनुसार फरक रहेको केसीको बुझाइ छ। त्यसैले सबै क्षेत्रलाई एउटै दृष्टिकोणबाट हेर्नुभन्दा स्थानीय आवश्यकताका आधारमा राजनीतिक एजेन्डा निर्माण गर्नुपर्ने उहाँले बताउनुभयो।
ग्रामीण क्षेत्रमा सडक, खानेपानी, कृषि, बीउबिजन, मलखाद, शिक्षा, स्वास्थ्य र रोजगारीका अवसरलाई प्राथमिकताका साथ उठाउनुपर्ने उहाँको धारणा छ।
त्यस्तै सहरी क्षेत्रमा बढ्दो महँगी, बेरोजगारी, अव्यवस्थित बस्ती, यातायात, फोहोरमैला व्यवस्थापन, सार्वजनिक सेवा प्रवाह तथा नागरिकका दैनिक जीवनसँग जोडिएका समस्यालाई राजनीतिक प्राथमिकतामा राख्नुपर्ने उहाँले बताउनुभयो।
‘जनताको समस्या सुन्ने र त्यसलाई राजनीतिक एजेन्डा बनाउने काम संगठनले गर्नुपर्छ,’ केसीले भन्नुभयो, ‘स्थानीय तहदेखि प्रदेश र संघीय सरकारसम्म आवश्यक समन्वय र दबाबमार्फत परिणाममुखी काम गर्नुपर्छ।’
केसीको राजनीतिक दृष्टिकोणमा सामाजिक सम्बन्ध र संगठन निर्माण एकअर्काका परिपूरक हुन्। समाजमा सक्रिय रहेर नागरिकसँग बनाएको सम्बन्धलाई संगठन विस्तारको आधार बनाउँदै जनताको आवश्यकता र अपेक्षालाई पार्टीको नीति तथा कार्यक्रममा समेट्ने उहाँको योजना छ।
उहाँले नेतृत्वलाई पदभन्दा जिम्मेवारीका रूपमा स्थापित गर्नुपर्नेमा जोड दिनुभएको छ।
‘नेतृत्व भनेको पद प्राप्त गर्नु मात्र होइन, जिम्मेवारी वहन गर्नु हो,’ उहाँले भन्नुभयो, ‘नेतृत्वले कार्यकर्तालाई निर्देशन मात्र दिने होइन, आवश्यक पर्दा उनीहरूसँगै जनताको बीचमा उभिन सक्नुपर्छ।’
जिल्ला अध्यक्षका लागि हुने आन्तरिक निर्वाचनलाई लोकतान्त्रिक अभ्यासका रूपमा लिँदै केसीले निर्वाचनपछि सबैलाई समेटेर अघि बढ्ने प्रतिबद्धता जनाउनुभएको छ।
उहाँले आन्तरिक प्रतिस्पर्धालाई व्यक्तिगत दूरी र मनमुटावको कारण बन्न दिन नहुने बताउनुभयो।
‘निर्वाचनमा प्रतिस्पर्धा स्वाभाविक हो, तर प्रतिस्पर्धा स्थायी विभाजनको कारण बन्नु हुँदैन,’ उहाँले भन्नुभयो, ‘निर्वाचनपछि व्यक्ति होइन, संगठनले जित्नुपर्छ र अन्ततः पार्टीले उठाएका मुद्दाले जित्नुपर्छ।’
आफू निर्वाचित भए पार्टीभित्रका सबै पक्ष, नेता तथा कार्यकर्ताको योगदान र विचारलाई सम्मान गर्दै सामूहिक नेतृत्वको अभ्यासलाई प्राथमिकता दिने उहाँले बताउनुभयो।
काठमाडौंमा राप्रपाको नयाँ सम्भावना खोज्ने दाबि
काठमाडौंको राजनीतिक परिवेश निरन्तर परिवर्तन भइरहेका बेला राप्रपाले आफ्नो संगठनलाई थप प्रभावकारी र जनउत्तरदायी बनाउनुपर्ने केसीको निष्कर्ष छ।
नागरिकको बदलिँदो अपेक्षालाई सम्बोधन गर्न पार्टीले संगठनात्मक सक्रियतासँगै सामाजिक सरोकारका विषयमा प्रत्यक्ष उपस्थिति देखाउनुपर्ने उहाँको भनाइ छ।
वडा तहमा संगठन विस्तार, युवाको नेतृत्व विकास, महिला तथा समुदायको सहभागिता, जनसरोकारका मुद्दाको पहिचान र सरकारका सम्बन्धित तहसँग समन्वय तथा दबाबलाई समानान्तर रूपमा अघि बढाएर काठमाडौंमा राप्रपालाई बलियो राजनीतिक विकल्पका रूपमा स्थापित गर्ने उहाँले लक्ष्य अघि सार्नुभएको छ।
जिल्ला अध्यक्षका उम्मेदवार केसीले आफ्नो उम्मेदवारीलाई व्यक्तिगत पदको आकांक्षाभन्दा पनि संगठनलाई नयाँ ढंगले परिचालन गर्ने अवसरका रूपमा लिन आग्रह गर्दै काठमाडौं जिल्लाका राप्रपा नेता तथा कार्यकर्तासँग समर्थन र मतदानका लागि अपिल गर्नुभएको छ।
