साँखु,काठमाण्डौं —चेन्नई दक्षिण भारतीय चलचित्र उद्योगका चर्चित अभिनेता Thalapathy Vijay अब औपचारिक रूपमा तमिलनाडुको सत्ताको केन्द्रमा पुगेका छन्। चलचित्रमार्फत करोडौं दर्शकको मन जितेका विजयले राजनीतिमा प्रवेश गरेको छोटो समयमै ऐतिहासिक सफलता हासिल गर्दै तमिलनाडुको मुख्यमन्त्री बन्ने बाटो तय गरेका हुन्।
नेपालमा “घण्टी बजाउने” अभियानमार्फत वैकल्पिक राजनीतिक लहर सिर्जना गर्दै Balen Shah प्रधानमन्त्री बनेपछि दक्षिण भारतको तमिलनाडुमा अहिले “सिठ्ठी बजाउने” अभियानले सत्ता परिवर्तन गराएको छ।
नेपालमा बालेन साहले पुराना दलविरुद्ध युवापुस्ताको समर्थन जुटाउँदै “घण्टी” लाई परिवर्तनको प्रतीक बनाएका थिए भने भारतमा विजयले “सिठ्ठी” लाई परिवर्तनको संकेत बनाए। दुवै नेताको उदयलाई परम्परागत राजनीतिविरुद्ध जनताको असन्तुष्टिको परिणामका रूपमा हेरिएको छ।
थालस्पती विजयले नेतृत्व गरेको Tamilaga Vettri Kazhagam (टिभिके) ले बहुमत जुटाएपछि तमिलनाडुका राज्यपाल Rajendra Arlekar ले विजयलाई मुख्यमन्त्री नियुक्त गरेका हुन्। उनको शपथ ग्रहण समारोह आइतबार बिहान चेन्नईस्थित Jawaharlal Nehru Stadium मा आयोजना हुने तय भएको छ।
राजनीतिक विश्लेषकहरूले यसलाई तमिल राजनीतिमा नयाँ युगको सुरुवातका रूपमा व्याख्या गरेका छन्। द्रविड राजनीतिमा दशकौंदेखि प्रभाव जमाइरहेका डिएमके र एआईएडीएमकेबीचको परम्परागत प्रतिस्पर्धालाई तोड्दै विजयले नयाँ राजनीतिक शक्ति निर्माण गरेका हुन्।
समर्थनसँगै बहुमत सुरक्षित
२३४ सदस्यीय तमिलनाडु विधानसभामा टिभिकेले १०८ सिट जितेको थियो। विजय स्वयं दुई निर्वाचन क्षेत्रबाट निर्वाचित भएकाले एक सिट छाड्नुपर्नेछ। त्यसपछि दलको संख्या १०७ मा सीमित हुनेछ। तर सरकार गठनका लागि आवश्यक ११७ सांसदको बहुमत उनले सहयोगी दलको समर्थनबाट सहजै सुरक्षित गरेका छन्।
Indian National Congress, Communist Party of India, Communist Party of India (Marxist), Viduthalai Chiruthaigal Katchi तथा Indian Union Muslim League ले समर्थन जनाएपछि टिभिके पक्षमा १२१ सिट पुगेको छ।
भीसीके नेता Thol. Thirumavalavan ले विजयको नेतृत्वलाई “तमिल जनताको वैकल्पिक आशा” को संज्ञा दिएका छन्।
‘सिठ्ठी अभियान’ ले बदल्यो चुनावी समीकरण
विजयले यस निर्वाचनमा “सिठ्ठी अभियान” सञ्चालन गरेका थिए। उनले आफूलाई हरेक तमिल परिवारको सदस्यका रूपमा प्रस्तुत गर्दै “सिठ्ठी” लाई परिवर्तन, पारिवारिक भरोसा र सामाजिक न्यायको प्रतीक बनाएका थिए।
चुनावी सभामा उनले डिएमकेलाई “भ्रष्ट र जनविरोधी शक्ति” भन्दै आलोचना गरेका थिए भने Bharatiya Janata Party लाई वैचारिक चुनौतीका रूपमा चित्रण गरेका थिए। यही कारण उनले कुनै गठबन्धन नगरी एक्लै चुनाव लड्ने निर्णय गरेका थिए।
विश्लेषकहरूका अनुसार युवापुस्ता, चलचित्रप्रेमी तथा मध्यम वर्गीय मतदाताले विजयलाई परिवर्तनको प्रतीकका रूपमा समर्थन गरेका कारण उनको पार्टी अप्रत्याशित रूपमा सत्तामा पुगेको हो।
राजनीतिमा नयाँ तरंग, विवाद पनि सँगै
सरकार गठनको प्रक्रियासँगै विवाद पनि सतहमा आएको छ। T. T. V. Dhinakaran नेतृत्वको Amma Makkal Munnetra Kazhagam ले आफ्ना विधायकलाई फकाउने प्रयास भएको आरोप लगाएको छ।
दिनाकरनले राज्यपाललाई भेट्दै टिभिकेविरुद्ध उजुरी दिएका छन्। उनले सार्वजनिक भएको एक भिडियो नक्कली भएको दाबी गर्दै त्यसमा विजय पक्षको संलग्नता रहेको आरोपसमेत लगाएका छन्। आवश्यक परे कानुनी कारबाही अगाडि बढाइने चेतावनी पनि दिएका छन्।
चलचित्रबाट राजनीतिसम्मको यात्रा
सन् १९७४ मा चेन्नईमा जन्मिएका विजय प्रसिद्ध निर्देशक S. A. Chandrasekhar का छोरा हुन्। बाल कलाकारका रूपमा अभिनय यात्रा सुरु गरेका उनले पछि दक्षिण भारतीय सिनेमामा सुपरस्टारको छवि बनाएका थिए।
Ghilli, Kaththi, Mersal र Bigil जस्ता सुपरहिट चलचित्रमार्फत उनले “थालापति” अर्थात् “कमाण्डर” को उपनाम कमाएका थिए।
विजयले सन् २०२४ फेब्रुअरी २ मा औपचारिक रूपमा टिभिके स्थापना गरेका थिए। स्थापना भएको छोटो समयमै निर्वाचन आयोगमा दर्ता भएको पार्टीले पहिलो ठूलो चुनावमै सत्ता हात पार्नु भारतीय क्षेत्रीय राजनीतिमा दुर्लभ उपलब्धि मानिएको छ।
दक्षिण भारतीय राजनीतिमा नयाँ शक्ति
तमिलनाडुमा चलचित्र र राजनीतिबीचको सम्बन्ध नयाँ होइन। यसअघि M. G. Ramachandran, J. Jayalalithaa तथा M. Karunanidhi जस्ता नेताहरूले पनि सिनेमाबाट राजनीति प्रवेश गरेका थिए।
अब विजयको उदयलाई त्यसै परम्पराको नयाँ अध्यायका रूपमा हेरिएको छ। तर विश्लेषकहरूका अनुसार लोकप्रियता र चुनावी सफलता मात्रै पर्याप्त नहुने भएकाले अब उनको वास्तविक परीक्षा सुशासन, रोजगारी, सामाजिक न्याय र आर्थिक विकासमा हुनेछ।
विभिन्न भारती मिडियाहरुबाट
