शंखरापुर, काठमाण्डौं। शंखरापुर नगरपालिका वडा नं. ६ कार्यालयको आयोजनामा इन्द्रायणीस्थित वृहस्पति फुटसलमा असोज २४ र २५ गते सम्पन्न ‘शंखरापुर वडा कप फुटसल प्रतियोगिता–२०८३’ को उपाधि हरहर महादेवले जितेको छ। फाइनल खेलमा मणिचूडलाई ५–० गोलको फराकिलो अन्तरले पराजित गर्दै हरहर महादेवले उपाधि जितेको हो।
प्रतियोगितामा मणिचूड उपविजेता र प्रताप क्लब तेस्रो भएका छन्। विभिन्न वडाका २० टोली सहभागी प्रतियोगिताले स्थानीय खेलाडीलाई आफ्नो खेलकौशल प्रदर्शन गर्ने अवसर प्रदान गरेको छ।
प्रतियोगिताको समापन समारोहका प्रमुख अतिथि शंखरापुर नगरपालिका वडा नं. ६ का वडाध्यक्ष एवं नगर प्रवक्ता राधाकृष्ण श्रेष्ठले युवालाई मोबाइलको बढ्दो लतबाट बाहिर निकाल्दै खेलकुदमा आकर्षित गर्नुपर्नेमा जोड दिनुभयो। खेलकुदले युवाको शारीरिक तथा मानसिक स्वास्थ्य सुधार गर्नुका साथै अनुशासन, आत्मविश्वास र जीवनका चुनौतीसँग जुध्न सक्ने क्षमता विकास गर्ने उहाँको भनाइ थियो।
युवालाई मोबाइलको लतबाट बाहिर निकालेर खेलमैदानमा ल्याउनुपर्छ
समापन समारोहलाई सम्बोधन गर्दै वडाध्यक्ष श्रेष्ठले फुटसल प्रतियोगिता खेलमा प्रतिस्पर्धा गराउने कार्यक्रम मात्र नभई युवालाई सक्रिय, अनुशासित र आत्मविश्वासी बनाउने महत्वपूर्ण माध्यम भएको बताउनुभयो।
“युवालाई एकोहोरो मोबाइलमा झुमिरहने अवस्थाबाट बाहिर निकालेर खेलकुदमा सहभागी गराउनु आवश्यक छ। खेलले शारीरिक तन्दुरुस्ती र मानसिक मनोबल बढाउनुका साथै जीवनमा आइपर्ने चुनौतीसँग सामना गर्ने क्षमता पनि विकास गर्छ,” उहाँले भन्नुभयो।
उहाँले खेलकुदले युवालाई जित र हारलाई सहज रूपमा स्वीकार गर्न, नियमको पालना गर्न, सामूहिक भावनाका साथ काम गर्न तथा अनुशासित जीवनशैली अपनाउन सिकाउने उल्लेख गर्नुभयो। युवाको ऊर्जा र क्षमतालाई सकारात्मक क्षेत्रमा परिचालन गर्न सके त्यसले व्यक्ति, समाज र नगरको विकासमा समेत योगदान पुर्याउने उहाँको धारणा थियो।
खेलकुद प्रतियोगितालाई निरन्तरता दिनुपर्नेमा जोड
वडाध्यक्ष श्रेष्ठले शंखरापुरमा खेलकुद गतिविधि विस्तार गर्दै स्थानीय युवाको सहभागिता बढाउनुपर्ने बताउनुभयो। खेलकुदलाई कुनै एक जनप्रतिनिधिको कार्यकालमा मात्र सीमित नराखी आगामी दिनमा निर्वाचित भएर आउने जनप्रतिनिधिले समेत यस्ता प्रतियोगितालाई निरन्तरता दिनुपर्ने उहाँको जोड थियो।
स्थानीयस्तरमा नियमित खेलकुद प्रतियोगिता सञ्चालन गर्न सके प्रतिभावान् खेलाडीको पहिचान गर्न, उनीहरूलाई आफ्नो क्षमता प्रदर्शन गर्ने अवसर दिन तथा खेलकुदप्रति युवाको आकर्षण बढाउन सकिने उहाँले बताउनुभयो। खेलकुद क्षेत्रको विकासका लागि स्थानीय तह, खेलाडी, खेलप्रेमी तथा सरोकारवालाबीच सहकार्य आवश्यक रहेको उहाँको भनाइ थियो।
हरहर महादेवलाई २५ हजार रुपैयाँ पुरस्कार
प्रतियोगितामा प्रथम भएको हरहर महादेवले नगद २५ हजार रुपैयाँसहित ट्रफी, मेडल र प्रमाणपत्र प्राप्त गरेको छ। उपविजेता मणिचूडले नगद १५ हजार रुपैयाँसहित ट्रफी, मेडल र प्रमाणपत्र प्राप्त गर्दा तेस्रो भएको प्रताप क्लबले नगद १० हजार रुपैयाँसहित ट्रफी, मेडल र प्रमाणपत्र प्राप्त गरेको छ।
प्रतियोगितामा प्रनिश थापा उत्कृष्ट खेलाडी घोषित भएका छन्। उदय थापा उत्कृष्ट गोलरक्षक घोषित हुँदा अच्युत थापा सर्वाधिक गोलकर्ता बनेका छन्। अच्युत थापाले प्रतियोगिताभर १३ गोल गरेका थिए।
व्यक्तिगत विधामा उत्कृष्ट घोषित खेलाडीलाई समेत ट्रफी तथा पुरस्कार प्रदान गरिएको थियो। प्रतियोगितामा खेलाडीले गरेको प्रदर्शनको मूल्याङ्कन गर्दै उत्कृष्ट खेलाडी, उत्कृष्ट गोलरक्षक र सर्वाधिक गोलकर्तालाई सम्मान गरिएको आयोजकले जनाएको छ।
खेलकुदले स्वास्थ्यसँगै अनुशासन पनि सिकाउँछ
समापन समारोहमा राष्ट्रिय प्रजातन्त्र पार्टी (राप्रपा) का जिल्ला अध्यक्ष दीपक केसीले खेलकुदले शरीरलाई स्वस्थ राख्नुका साथै व्यक्तिलाई अनुशासित बनाउन महत्वपूर्ण भूमिका खेल्ने बताउनुभयो। उहाँले प्रतियोगिताका विजेता तथा सहभागी टोलीलाई बधाई र शुभकामना व्यक्त गर्नुभयो।
राप्रपा नेता मिजेन्द्र काजी श्रेष्ठले वडा नं. ६ को आयोजनामा सम्पन्न प्रतियोगिताले नगरस्तरीय स्वरूप लिएको उल्लेख गर्नुभयो। उहाँले विजेता टोलीलाई बधाई दिँदै अन्य सहभागी टोलीलाई आगामी वर्षको प्रतियोगिताका लागि तयारी गर्न र अझ राम्रो प्रदर्शन गर्न शुभकामना दिनुभयो।
उहाँले विजया दशमी, तिहार, नेपाल संवत् ११४७ तथा छठ पर्वको शुभकामनासमेत व्यक्त गर्नुभयो।
वडा सदस्य मानन्धरको सभापतित्वमा समापन
समापन समारोहको सभापतित्व शंखरापुर नगरपालिका वडा नं. ६ का वडा सदस्य ज्ञानरत्न मानन्धरले गर्नुभएको थियो। उहाँले प्रतियोगिता सफलतापूर्वक सम्पन्न भएकोमा खुसी व्यक्त गर्दै विजेता टोलीसँगै व्यक्तिगत विधामा उत्कृष्ट प्रदर्शन गर्ने खेलाडीलाई समेत पुरस्कार प्रदान गर्न पाउँदा आफूहरू उत्साहित भएको बताउनुभयो। उहाँले सहभागी सबै टोली, खेलाडी तथा प्रतियोगिता सफल बनाउन सहयोग गर्ने सरोकारवालालाई धन्यवाद दिँदै कार्यक्रम समापन गर्नुभयो।
कार्यक्रममा प्रहरी प्रभाग साँखुका प्रमुख मणिराम थापा, राप्रपा जिल्ला अध्यक्ष दीपक केसी, राप्रपा नेता मिजेन्द्र काजी श्रेष्ठ, राप्रपा नगर अध्यक्ष राजेन्द्रकुमार श्रेष्ठलगायत अतिथिहरूको सहभागिता रहेको थियो। त्यसैगरी भविष्य कृषि सहकारीका अध्यक्ष जनता श्रेष्ठ, शंखरापुर नगरपालिका वडा नं. ७ का वडा सदस्य अर्चेन देव शाही, राजकुमार थापालगायत स्थानीयवासीको उपस्थिति रहेको थियो।
स्थानीय युवालाई खेलकुदमा आकर्षित गर्ने, खेल प्रतिभाको पहिचान गर्ने तथा स्वस्थ र अनुशासित जीवनशैली प्रवर्द्धन गर्ने उद्देश्यले प्रतियोगिता आयोजना गरिएको हो। प्रतियोगिताले युवाबीच आपसी सद्भाव, सहकार्य र खेलभावना अभिवृद्धि गर्नुका साथै शंखरापुरमा खेलकुद संस्कृतिको विकासमा योगदान पुर्याएको आयोजकको विश्वास छ।
