थापाडाँडामा ५० वर्षीय पुरुष मृत फेला

lawanyasandesh.com

शंखरापुर (साँखु), काठमाण्डौं। शंखरापुर नगरपालिका वडा नं. ५ थापाडाँडास्थित पालुवारी भुजेल टोलमा ५० वर्षीय राजु भुजेल मृत अवस्थामा फेला परेका छन्।

स्थानीय निवासी भुजेल २०८३ साल मङ्सिर ५ गते बिहान आफ्नै घरमुनि रहेको भगटे रुखमा नाइलनको डोरीको सहायताले झुण्डिएको अवस्थामा फेला परेका हुन्। प्रारम्भिक घटनास्थलको अवस्थाअनुसार उनले रुखमा नाइलनको डोरी बाँधी हाम्फालेको देखिएको प्रहरीले जनाएको छ।

आफन्तले उनलाई उक्त अवस्थामा देखेपछि तत्काल बिहान ९:३० बजे प्रहरी प्रभाग साँखुमा खबर गरेका थिए। सूचना प्राप्त भएपछि प्रहरी टोली बिहान ९:५० बजे घटनास्थल पुगेको थियो। प्रहरी टोलीले भुजेल मृत अवस्थामा रहेको जानकारीसहित घटनास्थलको मुचुल्का उठाउने तथा आवश्यक कानुनी प्रक्रिया सुरु गरेको थियो।

प्रहरी प्रभाग साँखुबाट प्राप्त जानकारीअनुसार शवलाई पोस्टमार्टम तथा थप परीक्षणका लागि बिहान १०:५० बजे महाराजगञ्जस्थित त्रिभुवन विश्वविद्यालय शिक्षण अस्पताल (टिचिङ अस्पताल) लगिएको छ।

मृतक भुजेल तीन सन्तानका पिता रहेको पारिवारिक विवरणबाट खुलेको छ। घटनापछि परिवारमा शोक छाएको छ। परिवारका अनुसार यस्तो घटना होला भन्ने आफूहरुले कहिल्यै कल्पना नगरेको बताएका छन्। परिवारका लागि यो घटना अप्रत्याशित र पीडादायी बनेको छ।

घटनाको वास्तविक कारणबारे भने अहिलेसम्म आधिकारिक निष्कर्ष सार्वजनिक भएको छैन। पोस्टमार्टम रिपोर्ट र प्रहरीको थप अनुसन्धानपछि मात्र मृत्युको कारण तथा घटनासम्बन्धी थप तथ्य स्पष्ट हुने अपेक्षा गरिएको छ।

घटनाले स्थानीय क्षेत्रमा शोक र स्तब्धता छाएको छ।

प्रतिक्रिया