शंखरापुर, काठमाण्डौं । फिफा विश्वकप २०२६ अन्तर्गत समूह ‘एच’ को आफ्नो दोस्रो खेलमा स्पेनले साउदी अरेबियालाई ४–० को फराकिलो अन्तरले पराजित गर्दै प्रतियोगितामा पहिलो जित दर्ता गरेको छ। पहिलो खेलमा केप भर्डसँग गोलरहित बराबरीमा रोकिएको स्पेनले अमेरिकास्थित मर्सिडीज–बेन्ज स्टेडियममा शनिबार राति उत्कृष्ट आक्रमणात्मक खेल प्रदर्शन गर्दै महत्वपूर्ण तीन अंक हात पारेको हो।
खेलको सुरुआतदेखि नै दबाब सिर्जना गरेको स्पेनले १०औँ मिनेटमा युवा स्टार Lamine Yamal को गोलमार्फत अग्रता लिएको थियो। यामालको गोलले स्पेनलाई थप आत्मविश्वास प्रदान गर्यो र टोलीले लगातार साउदी अरेबियामाथि दबाब कायम राख्यो।
स्पेनका कप्तान Mikel Oyarzabal ले २१औँ र २४औँ मिनेटमा लगातार दुई गोल गर्दै टोलीको अग्रता ३–० पुर्याए। ओयार्जाबालको उत्कृष्ट प्रदर्शनका कारण पहिलो हाफमै स्पेनले खेल आफ्नो नियन्त्रणमा लिएको थियो।
दोस्रो हाफ सुरु भएको चार मिनेटमै साउदी अरेबियाका डिफेन्डर हसन अल्तामबक्ति आत्मघाती गोल गर्न पुगेपछि स्पेनको अग्रता ४–० मा पुगेको थियो। त्यसपछि पनि स्पेनले आक्रमण जारी राख्दै थप गोलका अवसर सिर्जना गरिरह्यो।
इन्जुरी समयमा Ferran Torres ले बल जाली चुमाए पनि भिडियो असिस्टेन्ट रेफ्री (भिएआर) को समीक्षा पछि उक्त गोल अफसाइड ठहर गर्दै मान्यता दिइएन। त्यसैले खेल ४–० कै नतिजामा समाप्त भयो।
यस प्रभावशाली जितसँगै स्पेनले समूह ‘एच’ मा महत्वपूर्ण तीन अंक जोड्दै नकआउट चरण प्रवेशको सम्भावनालाई बलियो बनाएको छ। पहिलो खेलमा अंक बाँडेको स्पेनका लागि यो जित आत्मविश्वास बढाउने मात्र होइन, समूहको शीर्ष स्थानको दौडमा समेत निर्णायक मानिएको छ।
यता पराजित साउदी अरेबियामाथि भने अघिल्लो चरण पुग्ने दबाब थपिएको छ। स्पेनले देखाएको आक्रामक लय र संगठित खेलले उपाधि दाबेदार टोलीका रूपमा आफ्नो दाबीलाई अझ मजबुत बनाएको छ।
