शंखरापुर, काठमाण्डौं । शंखरापुर नगरपालिकाले शारीरिक अपाङ्गता भएका १८ वर्षमुनिका बालबालिकाहरूलाई लक्षित गर्दै विशेष स्वास्थ्य परीक्षण, उपचार तथा पुनःस्थापना सम्बन्धी नि:शुल्क ‘घुम्ती शिविर’ सञ्चालन गर्ने भएको छ। बालबालिकाको स्वास्थ्य सुधार र पुनःस्थापनालाई केन्द्रमा राखेर आयोजना गर्न लागिएको उक्त शिविरले स्थानीय अभिभावक तथा बालबालिकालाई प्रत्यक्ष लाभ पुग्ने अपेक्षा गरिएको छ।
शंखरापुर नगरपालिका र बनेपास्थित अपाङ्ग बाल अस्पताल तथा पुनःस्थापना केन्द्र (HRDC) को संयुक्त आयोजनामा सञ्चालन हुन लागेको शिविरमा जन्मजात तथा विभिन्न कारणबाट शारीरिक समस्या भोगिरहेका बालबालिकाको विशेषज्ञ चिकित्सकद्वारा परीक्षण, उपचार तथा परामर्श सेवा प्रदान गरिने जनाइएको छ।
नगरपालिकाले सार्वजनिक सूचना जारी गर्दै आफ्नो क्षेत्रमा रहेका शारीरिक अपाङ्गता भएका बालबालिकालाई अनिवार्य रूपमा शिविरमा सहभागी गराई स्वास्थ्य लाभ लिन अभिभावकहरूलाई अनुरोध गरेको छ। विशेषगरी आर्थिक अवस्था कमजोर भएका परिवारका बालबालिकालाई लक्षित गरी यस्तो सेवा निःशुल्क रूपमा उपलब्ध गराउन लागिएको नगरपालिकाले जनाएको छ।
शिविरमा जाँच तथा उपचार गरिने समस्याहरू
शिविरमा मुख्य रूपमा निम्न प्रकारका शारीरिक समस्याहरूको परीक्षण, उपचार तथा आवश्यक परामर्श प्रदान गरिनेछः
जन्मजात खुट्टाको पैताला भित्र वा बाहिर फर्किएको समस्या
आगोले पोलेर शरीरका अङ्गहरू आपसमा टाँसिएको अवस्था
खुट्टा लुलो भएको, कमजोर वा भाँचिएर बाङ्गिएको समस्या
हड्डी पाकेर लामो समयदेखि पीप आइरहने समस्या
ढाड बाङ्गो भएको वा कुप्रो परेको अवस्था
ओठ तथा तालु फाटेको समस्या
औँलाहरू आपसमा टाँसिएको वा आवश्यकभन्दा बढी औँला भएको अवस्था
कृत्रिम अङ्ग तथा अर्थोपेडिक सहायक सामग्री आवश्यक भएका बालबालिका
नगरपालिकाका अनुसार शिविरमा आएका बालबालिकाको अवस्थाअनुसार थप उपचार आवश्यक परे सम्बन्धित विशेषज्ञ संस्थासँग समन्वय गरी थप सेवा उपलब्ध गराइनेछ। साथै आवश्यकताअनुसार कृत्रिम अङ्ग, बैसाखी, विशेष जुत्ता लगायतका सहायक सामग्रीहरू समेत वितरण गरिने जानकारी दिइएको छ।
शिविर सञ्चालन हुने मिति र स्थान
नगरपालिकाले सार्वजनिक गरेको विवरणअनुसार घुम्ती शिविर आगामी २०८३ वैशाख २८ गते सोमबार सञ्चालन हुनेछ। शिविर साँखु स्वास्थ्य चौकी, शंखरापुर नगरपालिका वडा नं. ७ मा बिहान ९ बजेदेखि सुरु हुने जनाइएको छ।
स्थानीय तहबाट बालबालिकाको स्वास्थ्य, पुनःस्थापना तथा सामाजिक समावेशीकरणलाई प्राथमिकतामा राखेर यस्तो कार्यक्रम सञ्चालन गर्न लागिएको भन्दै नगरपालिकाले सबै सरोकारवालालाई सहयोग र समन्वयका लागि आग्रह गरेको छ। स्थानीयवासीले समेत यस्तो शिविरले आर्थिक अभावका कारण उपचारबाट वञ्चित बालबालिकालाई ठूलो राहत पुग्ने विश्वास व्यक्त गरेका छन्।
