शंखरापुर, काठमाडौँ ।
काठमाडौंको बौद्ध गेटअगाडि सोमबार अपराह्न एक युवतीले आफ्नै शरीरमा पेट्रोल खन्याएर आगो लगाई आत्मदाहको प्रयास गरेकी छन्। घटनामा उनको शरीर ५० प्रतिशतभन्दा बढी जलेको छ भने हाल कीर्तिपुरस्थित बर्न अस्पतालको सघन उपचार कक्ष (आईसीयू)मा उपचार भइरहेको छ।
काभ्रेपलाञ्चोकको तिमाल गाउँपालिका स्थायी घर भई हाल बौद्धमा बसोबास गर्दै आएकी २७ वर्षीया सालु गुरुङले सोमबार अपराह्न करिब पौने ४ बजे बौद्ध गेटअगाडि आफ्नो शरीरमा पेट्रोल खन्याएर आगो लगाएको प्रहरीले जनाएको छ। गुरुङ बौद्ध क्षेत्रमा खाजाघर सञ्चालन गर्दै आएकी विवाहित महिला हुन्।
घटनालगत्तै स्थानीयवासी र सुरक्षाकर्मीको सहयोगमा उनको उद्धार गरी शंखरापुर–६ स्थित सुष्मा कोइराला मेमोरियल अस्पताल पुर्याइएको थियो। अस्पतालका अनुसार उनको शरीरको ठूलो भाग जलेका कारण अवस्था गम्भीर रहेपछि तत्काल थप उपचारका लागि कीर्तिपुरस्थित बर्न अस्पताल रिफर गरिएको हो। हाल उनी आईसीयूमा चिकित्सकहरूको निगरानीमा उपचाररत रहेको अस्पतालले जनाएको छ।
घटनाका प्रत्यक्षदर्शी राजेश श्रेष्ठका अनुसार आगोले शरीर डढिरहेको देखेपछि स्थानीयवासीले तत्काल कपडा बेरेर आगो निभाएका थिए। आगो नियन्त्रणमा लिएपछि एम्बुलेन्समार्फत उनलाई अस्पताल पठाइएको उनले बताए।
घटनाको वास्तविक कारण भने अझै खुल्न सकेको छैन। प्रहरीले यस विषयमा आधिकारिक धारणा सार्वजनिक नगरे पनि स्थानीय एक छिमेकीले प्रारम्भिक रूपमा ऋणको बोझ र पारिवारिक कलहका कारण गुरुङले यस्तो चरम कदम चालेको हुन सक्ने बताएका छन्। प्रहरीले भने यस्ता दाबीको स्वतन्त्र पुष्टि नभएको स्पष्ट पार्दै घटनाका सबै पक्षबारे सूक्ष्म अनुसन्धान भइरहेको जनाएको छ।
बौद्ध गेटजस्तो अत्यधिक भीडभाड हुने सार्वजनिक स्थानमा दिउँसै भएको यस घटनाले त्यहाँ उपस्थित सर्वसाधारणलाई स्तब्ध बनाएको छ। सार्वजनिक स्थलमै भएको यस्तो दुःखद घटनाले मानसिक स्वास्थ्य, पारिवारिक तथा आर्थिक समस्याको समयमै सम्बोधन, सामाजिक सहयोग प्रणालीको सुदृढीकरण तथा सार्वजनिक सुरक्षा व्यवस्थाप्रति सम्बन्धित निकायको थप संवेदनशीलता आवश्यक रहेको संकेत गरेको छ।
प्रहरी बृत बौद्धले घटनाको वास्तविक कारण, घटनाअघि भएका गतिविधि, उपलब्ध सीसीटीभी फुटेज तथा अन्य प्रमाणका आधारमा विस्तृत अनुसन्धान भइरहेको जनाएको छ।
